ഊരകം
ഗ്രാമ പഞ്ചായത്ത്

കേരളത്തിലെ പഞ്ചായത്തീരാജ് സംവിധാനം ലോകത്തിന് തന്നെ മാതൃകയായ ഒന്നാണ്. 1996-ൽ ആരംഭിച്ച ജനകീയ ആസൂത്രണ പ്രസ്ഥാനം വഴി വികസന പ്രവർത്തനങ്ങളുടെ തീരുമാനമെടുക്കാനുള്ള അധികാരം താഴെത്തട്ടിലുള്ള ജനങ്ങളിലേക്ക് എത്തിക്കാൻ പഞ്ചായത്തിന് സാധിച്ചു. ഗ്രാമസഭകൾ വഴി ഗുണഭോക്താക്കളെ തിരഞ്ഞെടുക്കുന്നതും പ്രാദേശികമായ ആവശ്യങ്ങൾ മുൻനിർത്തി പദ്ധതികൾ തയ്യാറാക്കുന്നതും സുതാര്യമായ ഒരു ഭരണസംവിധാനം ഉറപ്പുവരുത്തുന്നു. റോഡുകൾ, കുടിവെള്ളം തുടങ്ങിയ ഭൗതിക സാഹചര്യങ്ങൾക്കൊപ്പം തന്നെ വിദ്യാഭ്യാസം, ആരോഗ്യം, സ്ത്രീശാക്തീകരണം (കുടുംബശ്രീ വഴി) എന്നീ മേഖലകളിൽ വിപ്ലവകരമായ മാറ്റങ്ങൾ കൊണ്ടുവരാൻ പഞ്ചായത്തിന് കഴിഞ്ഞിട്ടുണ്ട്.

കാഴ്ചപ്പാട് (Vision)

ജനങ്ങളുടെ പങ്കാളിത്തത്തോടെ സാമൂഹ്യനീതി, സമഗ്ര വികസനം, പരിസ്ഥിതി സംരക്ഷണം എന്നിവ ഉറപ്പാക്കി സ്വയംപര്യാപ്തവും സുസ്ഥിരവുമായ ഗ്രാമ സമൂഹം സൃഷ്ടിക്കുക.

ദൗത്യം (Mission)

• ജനങ്ങൾക്ക് അടിസ്ഥാന സൗകര്യങ്ങളും ഗുണമേന്മയുള്ള സേവനങ്ങളും കാര്യക്ഷമമായി ലഭ്യമാക്കുക.
• ആരോഗ്യ, വിദ്യാഭ്യാസ, കുടിവെള്ളം, ശുചിത്വം, കാർഷികം തുടങ്ങിയ മേഖലകളിൽ സമഗ്ര വികസനം നടപ്പാക്കുക.
• സ്ത്രീകൾ, കുട്ടികൾ, വയോജനങ്ങൾ, ഭിന്നശേഷിക്കാർ എന്നിവരുടെ ക്ഷേമം ഉറപ്പാക്കുക.
• ജനപങ്കാളിത്തം പ്രോത്സാഹിപ്പിച്ച് സുതാര്യവും ഉത്തരവാദിത്വമുള്ള ഭരണ സംവിധാനം നടപ്പാക്കുക.
• പ്രകൃതി വിഭവ സംരക്ഷണവും ഹരിത വികസനവും മുൻനിർത്തി പ്രവർത്തിക്കുക.

​ഭാവികാഴ്ചപ്പാടും സുസ്ഥിര വികസനവും

ഊരകം ഗ്രാമ പഞ്ചായത്തിൻറെ കാഴ്ചപ്പാട് കേവലം നിർമ്മാണ പ്രവർത്തനങ്ങളിൽ മാത്രം ഒതുങ്ങുന്നില്ല. സുസ്ഥിര വികസന ലക്ഷ്യങ്ങൾ  മുൻനിർത്തി പരിസ്ഥിതി സൗഹൃദമായ വികസനത്തിനാണ് ഇപ്പോൾ മുൻഗണന നൽകുന്നത്. മാലിന്യമുക്തം നവകേരളം പദ്ധതിയിലൂടെ ശുചിത്വമുള്ള ഗ്രാമങ്ങൾ സൃഷ്ടിക്കുക, ഡിജിറ്റൽ സാക്ഷരത ഉറപ്പാക്കി ഇ-ഗവേണൻസ് സംവിധാനങ്ങൾ ജനങ്ങളിലേക്ക് എത്തിക്കുക, കാലാവസ്ഥാ വ്യതിയാനത്തെ പ്രതിരോധിക്കാൻ സാധ്യമായ പ്രാദേശിക പദ്ധതികൾ ആവിഷ്കരിക്കുക എന്നിവയാണ് വരുംകാലത്തെ പ്രധാന ലക്ഷ്യങ്ങൾ. ജനങ്ങളുടെ ജീവിതനിലവാരം ഉയർത്തുന്നതിനൊപ്പം പ്രകൃതിയെ സംരക്ഷിച്ചുകൊണ്ടുള്ള ഒരു വികസന സംസ്കാരമാണ് ഊരകം ഗ്രാമ പഞ്ചായത്ത് വിഭാവനം ചെയ്യുന്നത്.